Skipstjórar fá ekki miskabætur
Dæmt var í máli tveggja skipstjóra hvalveiðibáta í Héraðsdómi Suðurlands í síðustu viku. Mennirnir vildu fá dæmdar miskabætur frá Matvælastofnun og Fiskistofu vegna stjórnsýslueftirlits stofnananna við hvalveiðar. Þeim varð hins vegar ekki kápan úr því klæðinu. Þeir höfðu farið fram á tvær milljónir króna hvor.
Skipstjórarnir sögðust hafa orðið fyrir miska vegna eftirlits með hvalveiðum síðastliðið haust. Þeir hafi til að mynda þurft að sæta viðvarandi myndbandsupptökum. Þeir töldu eftirlitið án fullnægjandi lagastoðar. Jafnframt bryti það gegn persónuverndarlöggjöf.
Í dómunum kemur fram að vera eftirlitsmanna hafi ekki hverið umfram heimildir eða tilefni. Málshefjendur hefðu auk þess ekki sýnt fram á hvernig eftirlitið hefði gengið gegn meðalhófi.
„Þvert á móti þykja stefndu hafa rennt stoðum undir að viðveran og eftirlitið hafi ekki verið umfram tilefnið og ekki hafi verið brotið gegn meðalhófsreglu. Þá getur hér ekki skipt máli að í leyfi Hvals hf. og lögum og reglum um hvalveiðar komi fram að Hvalur hf. og starfsemi fyrirtækisins sæti tilteknu eftirliti, en það eftirlit lýtur að öðrum þáttum en dýravelferð. Verður þannig hvorki fallist á að það eftirlit sem mælt er fyrir um í reglugerð nr. 917/2022 gangi gegn meðalhófsreglu, né heldur eftirlitið sem framkvæmt var á grundvelli reglugerðarinnar,“ að því er fram kemur í dómnum.