Skemmtiferðaskipum hafi fjölgað of hratt
Ferðamálastjóri segir að skoða þurfi betur ávinninginn af komu skemmtiferðaskipa hingað til lands. Vöxtur í komu skemmtiferðaskipa til landsins hafi verið of hraður og grípa þurfi í taumana þrátt fyrir að ávinningurinn sé mikill í smærri sveitarfélögum.
„Þessi litlu hagkerfi njóta mjög góðs af komu þessara ferðamannaskipa og afleiddri neyslu sem verður til á þessu svæði,“ sagði Arnar Már Ólafsson ferðamálastjóri í Morgunútvarpi á Rás 2.
Mengun frá skemmtiferðaskipum hefur verið í umræðunni í sumar. Ný skýrsla Transport and Environment sýnir að Ísland er á meðal þeirra 10 ríkja sem verða fyrir mestri mengun frá skemmtiferðaskipum.
Útlit er fyrir metfjölda skipa og um 70% fleiri skip en í fyrra. Fram kemur í viðtalinu að á Akureyri sé gert ráð fyrir 272 skipum í sumar en 280 eru í áætlun í Faxaflóahöfnum.