Matvælastofnun afléttir banninu
Matvælastofnun hefur lokið rannsókn á frávikum við veiðar Hvals 8 á langreið sem leiddi til tímabundinnar stöðvunar, að því er fram kemur á vef stofnunarinnar.
MAST setti þau skilyrði fyrir því að banninu yrði aflétt, að fram færi skotæfing á sjó. Tilgangurinn var að sýna fram á hæfni skyttunnar á skipinu. Þessum æfingum er lokið.
Einnig var það skilyrði sett að verklagsreglur yrðu uppfærðar með tilliti til athugasemda sem MAST og Fiskistofa gerðu. Verklagsreglurnar yrðu svo stofnanirnar að samþykkja og þær kynntar fyrir áhöfnum Hvals 8 og 9.
Matvælastofnun hefur enn til skoðunar hvort lagt verður á stjórnvaldssekt vegna þessa máls. Eins mun stofnunin áfram fylgjast með framkvæmd veiða og grípa til aðgerða ef önnur alvarleg frávik koma upp.