Bæði skip með fullfermi

Vestmannaeyjaskipin Bergur VE og Vestmannaey VE lönduðu bæði fullfermi í Neskaupstað sl. sunnudag að því er segir á heimasíðu Síldarvinnslunnar. Þar er rætt við skipstjóra þessara skipa.

Haft er eftir Birgi Þór Sverrissyni, skipstjóra á Vestmannaey, að túrinn hefði gengið vel og blíðuveður hefði verið á miðunum. „Við vorum mest á Gerpisflakinu en komum við á Skrúðsgrunni og Tangaflaki. Aflinn var mest ýsa og dálítill þorskur og þetta var hinn fallegasti fiskur.“

Jón Valgeirsson, skipstjóri á Bergi, tekur undir með Birgi Þór og segir að vel hafi aflast. „Aflinn hjá okkur var mest ýsa og veiðin var ágæt í túrnum. Við veiddum að mestu á Gula teppinu og á Gerpisflaki. Við þurftum einfaldlega ekki að fara víða, þetta var býsna þægilegt og fiskurinn var með ágætum. Án efa verður haldið áfram hérna fyrir austan um sinn,“ segir Jón við heimasíðuna.