Beitir og Barði stefna í færeysku lögsöguna

Í gærmorgun héldu Síldarvinnsluskipin Barði NK og Beitir NK til kolmunnaveiða en kolmunna hefur ekki verið landað hjá Síldarvinnslunni síðan í byrjun þessa mánaðar. Þetta kemur fram á vef fyrirtækisins.

Þar er haft eftir Þorkeli Péturssyni skipstjóra að ferðinni sé heitið í færeysku lögsöguna. „Það eru ekki miklar fréttir þaðan en Vilhelm Þorsteinsson er þar að veiðum núna. Hann hefur veitt austur af eyjunum en var að færa sig eitthvað sunnar síðast þegar fréttist af honum. Mér skilst að nokkur íslensk skip séu að hefja kolmunnaveiðar um þessar mundir. Ég held að þetta verði bara skemmtilegt og hann spáir ágætlega fyrir næstu daga. Þetta verður bara þessi eini túr hjá okkur og Beiti að sinni en næsta ár verður mikið kolmunnaár. Það verður aukinn kvóti og það má segja að bjart sé yfir kolmunnanum. Svo bíða menn auðvitað spenntir eftir niðurstöðu hvað loðnuna varðar. Vonandi verður haldið til loðnuveiða fljótlega eftir áramót en ef ekki þá verður kolmunninn ærið verkefni,“ er haft eftir honum.