Veisla til heiðurs fyrrverandi starfsmönnum VSV og mökum
Glatt var á hjalla í veislu sem Vinnslustöðin bauð fyrrverandi starfsmönnum fyrirtækisins og mökum til á dögunum. Samkoman var í matsalnum glæsilega og þar voru á sjötta tug gesta.
Fæstir í hópnum höfðu stigið fæti inn fyrir dyr VSV eftir að nýtt starfsmannarými var tekið í gagnið og því var tekinn tími í að skoða það, nýja skrifstofu sömuleiðis og síðast en ekki síst uppsjávarhúsið.
Hefð er fyrir því að þessir virðulegu gestir séu boðnir til blóts á þorra en af því varð ekki í ár vegna COVID. Samkoman nú kom í staðinn en ekki þótti við hæfi að bera þorramat á borð á sumarbjörtum júnídegi. Þess vegna mætti sjálfur Einsi kaldi og eldaði handan mannskapnum mat sem honum er einum lagið að útbúa, dásamlega góðan saltfisk í portúgölskum anda og þorskkinn í tempura – sömuleiðis algjört lostæti.
Stjörnukokkurinn kynnti í leiðinni farsælt samstarf sitt og Vinnslustöðvarinnar.
Binni framkvæmdastjóri sagði gestum hvað á daga Vinnslustöðvarfólks hefði drifið undanfarin misseri og hvert fyrirtækið stefndi.
Hermann Kr. Jónsson, fyrrverandi aðalbókari VSV, flutti skemmtilega tölu um lífið og tilveruna í þá gömlu góðu daga og Siggi á Hvassó frumflutti nýjan og frumsaminn, íslenskan kántrýslagara. Þeir fengu mikið lof fyrir sín framlög.
Gestirnir voru svo leystir út með húfu og buffi merktu VSV og verða því auðþekkjanlegir framvegis í mannlífsflóru Eyjanna.
Þór Vilhjálmsson, fyrrverandi starfsmannastjóri og allsherjarreddari Vinnslustöðvarinnar, heldur í tengsla- og skipulagsþræði gagnvart fyrrverandi starfsmönnum haldið og gerir það virkilega vel.
- Lilja Björg Arngrímsdóttir tók myndir í veislunni og má sjá fleiri í slóðinni https://www.vsv.is/about-vsv/news/veisla-til-heidurs-fyrrverandi-starfsmonnum-vsv-og-mokum/
