Strandveiðar gætu verið stöðvaðar 1. eða 2. júlí
Strandveiðiflotinn hefur landað 7.560 tonnum af þorski það sem af er vertíðinni, eða 75,6% af uppgefnum aflaheimildum. Heimilt er að veiða 10 þúsund tonn af þorski.
Síðustu tvær vikur hafa veiðst 419 tonn á dag á strandveiðum. Ef sú meðalveiði heldur áfram eru á bilinu fimm til sex veiðidagar eftir. Veiðar verða þá að óbreyttu stöðvaðar 1. eða 2. júlí. Óveidd tonn eru í dag 2.440.
1.150 tonn af þorski fengust á skiptimarkaði fyrir makríl á dögunum. Dæmi eru um að ráðherra hafi bætt þeim tonnum við strandveiðipottinn. Ekkert er þó í hendi þar.
11. júní var stærsti dagurinn á strandveiðum á yfirstandandi vertíð en þá komu 491 tonn að landi.
Strandveiðimenn mótmæltu ótímabærri fyrirhugaðri stöðvun strandveiða á Austurvelli á dögunum. Þar var sett fram skýlaus krafa um að stjórnvöld stæðu við 48 daga.
Fram kom í frétt RÚV í gær að Landssamband smábátaeigenda áætli að 3.600 tonn þurfi í viðbót svo hægt verði að veiða út ágúst eins og reglugerð um strandveiðar segi til um. Þar af séu 1.600 tonn af þorski til, af skiptimarkaði fyrir makríl, og sé óráðstafað. Breyta þurfi síðan reglugerð um veiðar í atvinnuskyni þannig að veiðiheimildir til strandveiða verði 13.600 tonn af þorski, í stað 10.000 tonna.
