Þorskur á ítalska vísu

Við erum líklega fæst vön því að elda þorsk á ítalskan máta, en það er svo sannarlega góð tilbreyting frá hefðbundnari íslenskum eldunaraðferðum. Þessi uppskrift er ættuð frá Sikiley og er einföld og rétturinn hollur og góður.

Innihald:

• 2 msk. ólífuolía
• Sjávarsalt og nýmalaður svartur pipar
• 4 200g þorskbitar, helst hnakkar
• 1 meðalstór laukur, saxaður
• 3 hvítlauksgeirar, marðir
• 1 tsk. þurrkað oregano
• 1 hálfdós saxaðir tómatar
• 1 tsk. rauðvínsedik
• ¼ bolli fersk, söxuð steinselja

Aðferð:

Hitið olíu á stórri pönnu, sem hægt er að loka vel. Kryddið fiskinn með salti og pipar. Steikið fiskinn á pönnunni við góðan hita í um þrjár mínútur uns bitarnir eru orðnir gullnir að neðan. Snúið þeim þá við og steikið í aðrar þrjár mínútur.  Takið fiskinn af pönnunni og leggið til hliðar.

Setjið laukinn á pönnuna og steikið þar til hann er orðinn glær. Bætið þá hvítlauknum og oregano út í og látið krauma í eina mínútu. Setjið fiskinn aftur á pönnuna og hellið tómötunum yfir. Lokið pönnunni og látið malla í 3 til 7 mínútur efir þykkt fiskistykkjanna. Stráið steinselju yfir og berið fram með soðnum kartöflum eða pasta og salati að eigin vali.