Veiðigjald verði í eðlilegu hlutfalli við afrakstur veiðanna

Hin nýja ríkisstjórn Sjálfstæðisflokks, Viðreisnar og Bjartrar framtíðar telur kosti kvótakerfisins mikilvæga, en að kanna þurfi kosti annarra leiða svo sem markaðstengingu veiðigjalds. Viðreisn mun fara með ráðuneyti sjávarútvegsmála í hinni nýju ríkisstjórn.

„Núgildandi fiskveiðistjórnarkerfi hefur skilað miklum þjóðhagslegum ávinningi. Mikil hagræðing hefur átt sér stað í sjávarútvegi um leið og tekist hefur að tryggja sjálfbærni fiskveiða á Íslandsmiðum. Þá hefur öryggi sjómanna aukist til muna. Ríkisstjórnin telur kosti aflamarkskerfisins mikilvæga fyrir áframhaldandi verðmætasköpun í sjávarútvegi. Kannaðir verða kostir þess að í stað ótímabundinnar úthlutunar verði byggt á langtímasamningum og samhliða verði unnið að mati á þeim kostum sem tækir eru, svo sem markaðstengingu, sérstöku afkomutengdu gjaldi eða öðrum leiðum, til að tryggja betur að gjald fyrir aðgang að sameiginlegri auðlind verði í eðlilegu hlutfalli við afrakstur veiðanna. Gæta þarf að langtímarekstraröryggi í greininni og stöðugleika í byggðum,“ segir um sjávarútvegsmál í stjórnarsáttmálanum.