Verðhækkun á grásleppuhrognum á Grænlandi

Samtök veiðimanna á Grænlandi, KNAPK, og Royal Greenland hafa að undanförnu fundað um verð á grásleppuhrognum sem verkuð verða á komandi vertíð.  Aðilar hafa nú undirritað samkomulag sem skuldbindur RG til að greiða að lágmarki 27,5% hærra verð en greitt var á síðasta ári, samkvæmt frétt á heimasíðu Landssambands smábátaeigenda.

Verðhækkunin kemur ekki á óvart þar sem grásleppuveiðimönnum fækkaði mikið milli áranna 2015 og 2016 sem einkum var rakin til verðlækkana.  Með hækkuninni er þess freistað að snúa þessari þróun við.

Vertíðin 2016 á Grænlandi skilaði 5.730 tunnum, en áætlanir gerðu ráð fyrir 9.000 tunnum.

Grásleppuveiðar á Grænlandi hefjast 1. apríl.