Tíu bátar fengu viðbótarúthlutun í makríl

Úthlutað hefur verið viðbótaraflaheimildum í makríl vegna umsókna sem bárust fyrir rúmri viku. Fjöldi umsókna að þessu sinni voru 16 og voru 10 samþykktar. Öðrum umsóknum var hafnað þar sem skip uppfylltu ekki kröfu um veiðiskyldu, stærðarmörk eða greiðslu.

Úthlutunin að þessu sinni var 350.000 kg. Heildarúthlutun þessa árs er því 1.470.000 kg og því eru 530.000 kg eftir í pottinum sem verða til sölu í næstu viku. Sækja þarf um úthlutun þessarar viku fyrir lok föstudags.

Rétt er að benda á að frá og með næstu úthlutun þá hækkar gjald fyrir hvert kíló úr 2,78 kr. í 3,27krónur í samræmi við ákvæði reglugerðar 696/2017 um ráðstöfun 2.000 tonna viðbótaraflaheimilda í makríl á árinu 2017.