Plokkfiskur

Þegar við sem erum orðin eldri, vorum ung, var plokkfiskur kannski ekki í sérstöku uppáhaldi hjá okkur, enda var hann afgangur kvöldmatar gærdagsins, sem kannski var ekki heldur í uppáhaldi hjá okkur. Ýsa enn og aftur, eða þannig. Það sem við kláruðum ekki í gær, fengum við í kvöld. Nú horfir öðru vísi við og plokkfiskur er hreinlega fyrirtaksmatur með nútíma eldamennsku að mati flestra og á sumum góðum fiskveitingastöðum er „plokkarinn” einn af vinsælustu réttunum. Þess vegna leggjum við nú til að lesendur Kvótans plæsi á sig plokkfiski við fyrsta tækifæri.
Uppskriftin er fyrir 4 og er fengin af vefsíðunni fiskurimatinn.is

Innihald:

• 800 g þorskur/ýsa
• ½ laukur, skrældur og saxaður
• ½ teningur kjúklingakraftur
• 2 stk lárviðarlauf
• 50 g smjör
• 300 g kartöflur, skrældar og skornar í teninga
• ½ tsk hvítur pipar
• 1 tsk salt
• 3 msk hveiti
• 200 ml mjólk

Aðferð:

Setjið fiskinn ásamt lauknum og lárviðarlaufunum í pott með köldu vatni og fáið upp suðu, takið síðan af hitanum og setjið til hliðar. Bræðið smjör og bætið hveitinu út í og hrærið vel saman. Hellið mjólkinni út í og setjið með 100 ml af vatninu sem fiskurinn stendur í. Bætið kjúklingakraftinum, saltinu og piparnum út í og fáið upp suðu eða þar til sósan er orðin vel þykk. Sigtið fiskinn (passa að hafa laukinn með) og bætið út í sósuna ásamt kartöflunum og blandið vel saman. Smakkið til með salti og pipar.