Aflaverðmæti í júlí jókst um 20%

Verðmæti sjávarafla íslenskra skipa í júlí nam tæplega 10 milljörðum króna sem er um 20% aukning samanborið við júlí 2017. Verðmæti botnfiskaflans nam 6,2 milljörðum og jókst um 22,2%. Aflaverðmæti þorsks var tæpir 4 milljarðar sem er aukning um 28,2% samanborið við júlí 2017. Verðmæti flatfisktegunda nam rúmum 1,5 milljarði og jókst um 27,8% miðað við sama mánuð í fyrra. Verðmæti uppsjávarafla nam ríflega 1,9 milljarði sem er 17,4% meira en í júlí 2017.

Á 12 mánaða tímabili, frá ágúst 2017 til júlí 2018, nam aflaverðmæti úr sjó rúmum 124 milljörðum króna sem er 11% aukning miðað við sama tímabil ári fyrr samkvæmt tölum Hagstofu Íslands.

Skýringin á auknu aflaverðmæti frá sama mánuði árið áður liggur einfaldlega í meiri afla. Heildaraflinn í júlí í ár varð 93.551 tonn, sem er um 20.000 tonnum meiri en í sama mánuði í fyrra. Þar munar mestu um mikla aukningu í kolmunna. Aflinn þar fer úr 6.275 tonnum í 25.514 tonn, sem er um það bil fjórföldun. Botnfiskafli eykst um 16% milli þessara tímabili, en verðmæti hans um 22%, en það bendir til hærra verðs fyrir aflann nú en í fyrra. Aukning í þorskafla er sömuleiðis 16%, en verðmætið vex um 28,2%, sem endurspeglar töluverða hækkun á verðinu upp úr sjó.

Það sem veldur því að heildarverðmæti nú vex ekki jafnmikið hlutfallslega og aflinn, er það að megnið af magnaukningunni er í kolmunna, sem er mun ódýrari fisktegund en þorskurinn.