Tómas Þorvaldsson í heimahöfn með helling af grálúðu

Frystitogarinn Tómas Þorvaldsson kom til heimahafnar í Grindavík í fyrsta sinn gær, en Þorbjörn hf. Er eigandi hans. Þá kom hann með fínan grálúðuafla af Austfjarðamiðum. Skipstjórinn, Sigurður Jónsson, er ánægður eftir fyrsta túrinn. „Þetta er hörku sjóskip. Maður er búinn að finna það alveg í þessari veiðiferð. Tómas er þriðjungi stærri en Hrafn Sveinbjarnarson, sem ég var með áður og maður finnur stærðarmuninn mjög vel. Tómas veltur ekki neitt og því fer alveg rosalega vel um okkur. Strákarnir finna það vel. Þetta verður því alveg meiriháttar, þegar maður er búinn að gera þetta að sínu.“

Aflaverðmætið er um 117 milljónir, eftir um 15 daga á veiðum. „Fyrst vorum við að vinna í því koma okkur af stað og svo byrjaði þetta bara rúlla. Það tekur alltaf aðeins á að taka við nýju skipi, en þetta hefur gengið fínt. Við erum nánast eingöngu með grálúðu í þessum túr og vorum að veiðum fyrir austan að þessu sinni. Við reiknum með að vera á grálúðu fram að fyrsta september.“

Frystitogarinn Tómas Þorvaldsson landar í fyrsta sinn í heimahöfn í Grindavík. Ljósmynd Hjörtur Gíslason.

Sigurður segir að vinnslan hafi gengið vel, en engu að síður þurfi að laga hana að því sem nú sé verið að gera. „Hvort sem þú ert að kaupa hús eða skip, þarftu alltaf að aðlaga það að því sem þú vilt og ert að gera og vinnsluna þurfum við að laga að þeim kvóta sem við erum að vinna með. Þeir voru áður bara að veiða grálúðu og þorsk sitt hvorn helminginn af árinu. Vinnslulínan er því einföld og aðgerðaraðstaðan á millidekkinu er upphafleg. En aftur á móti er búið að endurnýja frystitæki, fremri helmingur þeirra var endurnýjaður fyrir fimm árum og þar eru sjálfvirk frystitæki.

Sigurður Jónsson, skipstjóri á Tómasi Þorvaldssyni, er ánægður með skipið. “Hann veltur ekki neitt.”

Það virkar mjög vel og strákarnir eru alveg hæst ánægðir með það. Það erfiðasta um borð í frystitogurum er venjulega vinnan í frystitækjunum, burður á pönnum og slá úr þeim og pakka. Þarna er þetta bara sjálfvirkt. Þú færð bara til þín tóma pönnu og raðar öskjunum í hana og sendir hana frá þér í frystitækin og svo þegar frystingin er næg, tekur kerfið pönnuna út, slær út henni og setur í kassa. Þá er frystigetan feikilega mikil og skipið fellur vel að þeim kvóta sem við höfum til umráða. Þetta er gott skip sem mikið var lagt í á sínum tíma, þegar það var smíðað og síðan hafa verið gerðar á því breytingar, sem bara eru til að gera skipið betra. Þetta lofa því bara góðu. Við kláruðum túrinn og allir komu heilir heim og það er það sem skiptir öllu máli,“ segir Sigurður.

Togarinn var upphaflega smíðaður fyrir Skagstrending á Skagaströnd og hét þá Arnar HU. Hann var síðan seldur til Grænlands og hét þá Sisimiut. Þorbjörn hf. í Grindavík keypti skipið í vetur og tók við því í vor. Það hélt svo til veiða eftir yfirferð í slipp í Hafnarfirði í júlí.

Tekið á móti nýja skipinu: Katrín Sigurðardóttir, Eiríkur Tómasson, Gerður Sigríður Tómasdóttir, Gunnar Tómasson og Rut Óskarsdóttir.
Ljósmynd Bergþór Gunnlaugsson.