Bakaður þorskur með límónusósu

Þorskur og aftur þorskur! Já, auðvitað því þorskurinn er úrvalds fiskur, sérstaklega ef hann er dreginn úr íslenskum sjó. Hér bjóðum við uppskrift að bökuðum þorski í mögnuðum kryddhjúp. Hún er tiltölulega einföld þó margar kryddtegundir séu í hjúpnum. Þetta er góð tilbreyting frá mörgum öðrum uppskriftum og hentar vel í rómantískan kvöldverð fyrir elskendur á öllum aldri.

Innihald:

1 tsk papríka

1 tsk þurrkuð steinselja

½ tsk oregano

½ tsk chilliduft

½ tsk hvítlauksduft

¼ tsk kúmenduft

¼ tsk salt

¼ tsk nýmalaður svartur pipar

Cayenne pipar á hnífsoddi

2 msk extra virgin ólífuolía

tveir þorkbitar um 200 g hvor

1 msk smjör, ósaltað

börkur og safi af tveimur límónum

Aðferð:

Blandið saman öllu kryddinu í skál og hrærið það vel saman. Setjið eina matskeið af olíunni út í og hrærið vel. Penslið síðan þorskbitana með blöndunni og notið hana alla. Setjið síðan fiskbitana í kæli í að minnsta kosti 30 mínútur.

Hitið ofninn í 230°C. Leggið fiskbitana á bökunarpappír í ofnskúffunni og bakið þá í 10-12 mínútur eða þar til hann er fulleldaður. Tíminn fer eftir þykkt stykkjanna.  Snúið þeim eftir 5 mínútur.

Bræðið smjörið í litlum potti og hrærið matskeið af olíu saman við. Bætið rifnum berki og safa úr límónunum út í og blandið vel saman. Setjið fiskbitana á disk og hellið blöndunni yfir. Berið fiskinn fram með soðnum hrísgrjónum og grænmeti að eigin vali.

Athugið að uppskriftin er aðeins fyrir tvo. Ef hafa á hana fyrir fjóra eða fleiri er einfalt að tvöfalda eða margfalda innihaldið.