Strandveiðimenn mótmæltu á Austurvelli
Vel var mætt á mótmæli sem strandveiðimenn efndu til á Austurvelli um helgina, vegna ótímabærrar stöðvunar strandveiða.
Strandveiðifélag Íslands stóð fyrir mótmælunum en að baki er stysta strandveiðivertíð frá upphafi strandveiða.
Sjómenn gengu fylktu liði frá Hörpu á hádegi á laugardag yfir á Austurvöll þar sem við tók dagskrá. Kári Stefánsson, forstjóri Íslenskrar erfðagreiningar ávarpaði samkomuna og lýsti í ræðu sinni yfir stuðningi við smábátasjómenn. „Ég er engin andstæðingur kvótakerfisins ég held að kvótakerfið sé góð leið til að stjórna fiskveiðum við Ísland, þó að framkvæmdin á því sé mjög bagaleg eins og stendur. Ég held að það verði að vanda sig betur í því hvernig menn deila þessum kvóta, ekki bara fyrir einstök félög heldur líka landshluta,“ sagði Kári meðal annars.
KK flutti nokkur lög og Kristján Torfi og tillukarlakórinn einnig.
Að lokum tendruðu strandveiðimenn blys og bjuggu þannig til mikið sjónarspil á Austurvelli.
Mótmælin fóru friðsamlega fram en strandveiðimenn vilja að ráðherra tryggi nægar aflaheimildir til veiðanna í þá fjóra mánuði sem þær eiga að standa yfir. Þeir hafa bent ráðherra sjávarútvegsmála á aflaheimildir sem hægt væri að færa til innan félagslega kerfisins; aflaheimildir eins og byggðakvóti sem ekki hefur verið að nýtast.