Skaginn 3X lokar á Ísafirði og segir upp 27
Skaginn 3X hefur sagt upp 27 starfsmönnum fyrirtækisins á Ísafirði. Ákveðið hefur verið að leggja niður starfsstöð fyrirtækisins í bænum. Þetta kemur fram í tilkynningu frá fyrirtækinu. Hingað til hefur fyrirtækið haft starfsstöð bæði á Akranesi og á Ísafirði. Fram kemur í tilkynningunni að þungum rekstri fyrirtækisins sé um að kenna. Skaginn3X er hátækniframleiðandi á kæli-, frysti- og vinnslukerfum fyrir alþjóðlegan matvælaiðnað með áherslu á sjávarútveg.
Alþjóðlega fyrirtækið Baader keypti árið 2020 60% hlut í Skaganum 3X. Þá stóð til að auka framleiðslu og stórefla rannsóknir og þróunarstarf á báðum stöðum. Í fyrra keypti Baader svo hin 40% sem eftir stóðu.
Fram kemur í tilkynningunni að ákvörðunin sé þungbær en byggi á umfangsmikilli endurskipulagningu.
Haft er eftir Sigsteini Grétarssyni forstjóra að reksturinn hafi verið mjög þungur síðustu misseri. Félagið hafi þurft að fara í viðamikið endurmat á skuldbindingum og kröfum í kjölfar eigendaskipta. Ólga hafi auk þess verið á mörkuðum, bæði vegna COVID og stríðsátaka. „Við höfum velt við hverjum steini þar sem þær rekstrar- og markaðslegu forsendur sem lagt var upp með við eigendaskiptin hafa ekki gengið eftir. Niðurstaðan varð sú að samþætta alla framleiðslu á Akranesi,“ er haft eftir Sigsteini í tilkynningunni.