Það var einfaldlega mokveiði

Ísfisktogarinn Gullver NS landaði í Vestmannaeyjum á síðasta degi vetrar. Aflinn var 85 tonn, meirihlutinn ýsa en einnig karfi. Þetta kemur fram á vef Síldarvinnslunnar. Þar er rætt við skiptasjórann, Hjálmar Ólaf Bjarnason. Hann segir að vel hafi gengið að fiska. „Staðreyndin er sú að við þurftum að skammta okkur afla. Það þurfti að taka tillit til þess hve áhöfnin kæmi miklu í gegn. Það var einfaldlega mokveiði. Við hófum veiðar á Öræfagrunni og héldum síðan í Grindavíkurdýpið þar sem tekin voru þrjú karfahol. Það var töluvert langt fyrir okkur að fara að austan og vestureftir, en við vorum einungis í tvo sólarhringa að veiðum í túrnum,” segir Hjálmar Ólafur.

Þetta mun vera í fyrst sinn sem Gullver landar bolfiski í Vestmannaeyjum, en hins vegar landaði hann þar makríl þrisvar eða fjórum sinnum sumarið 2014. Þá var makríllinn veiddur í Skerjadýpinu, Grindavíkurdýpinu og á Selvogsbanka.