Kjarasamningur milli sjómanna og SFS undirritaður

Kjarasamningur milli allra samtaka sjómanna og Samtaka fyrirtækja í sjávarútvegi var undirritaður rétt eftir miðnætti. Samningurinn fer nú í kynningu og atkvæðagreiðslu meðal félagsmanna aðildarfélaga SSÍ. Atkvæði um samninginn verða talin sunnudaginn 19. febrúar kl. 20:00 á skrifstofu ríkissáttasemjara.

Samningurinn var gerður án beinnar aðkomu stjórnvalda.

Fá frítt fæði og hlífðarfatnað

Heiðrún Lind Marteinsdóttir, framkvæmdastjóri Samtaka fyrirtækja í sjávarútvegi, segir í samtali á ruv.is að komið hafi verið að ögurstundu í kjaradeilu sjómanna og útgerðarinnar. Samningar náðust í nótt og fer samningurinn nú til atkvæðagreiðslu.

Heiðrún segir að öll mál nema eitt í viðræðunum hafi verið kláruð í vikunni. Sjómenn hafi viljað fá aðkomu stjórnvalda að viðræðum um  dagpeningamál og skattalega meðferð þeirra. „Síðan í gær dró aðeins til tíðinda. Það var ekki samhljómur milli sjómanna og ríkisvaldsins um það hvernig útfærsla á þessu gæti orðið og þá var ekkert annað í stöðunni en að við myndum reyna að klára þetta og ég held að það hafi verið mjög jákvætt að við hefðum getað gert samninga án aðkomu ríkisvaldsins. Ég held að það sé best fyrir alla aðila málsins.“

Heiðrún Lind var spurð að því í Vikulokunum hvort samningamenn hefðu fengið vísbendingu um að þeir væru að renna út á tíma með að fá á sig hugsanlega lagasetningu. Heiðrún segir að það væri vægt til orða tekið. „Eftir tíu vikur í verkfalli að þá veistu að það mun draga til tíðinda ef menn ná ekki saman. Það var sagt við okkur að það myndi vafalaust skella á á næstu dögum ef ekkert yrði að gert.“

Sjómenn hafa fengið greiddan 1600 krónur í mat á dag í fæðispeninga sem skattar hafa verið greiddir af. Heiðrún segir að um það sé samið að fæðið verði sjómönnum endurgjaldslaust og það sama eigi við um hlífðarföt. Samningarnir komi til með að kosta útgerðina yfir tvo milljarða króna aukalega á ári.

Við náðum bara saman

Samtalið á milli okkar og atvinnurekenda. Við náðum bara saman. „Það var ekkert endilega eitthvað eitt til þess. Menn töluðu bara vel saman og náðu samningi,“ sagði Konráð Alfreðsson, varaformaður Sjómannasambands Íslands í samtali við fréttastofu RUV í nótt.

Hann vildi ekkert gefa upp um efni samningsins, en gaf þó upp að tillaga sjávarútvegsráðherra hafi ekki gengið nógu langt til þess að ná að verða hluti af honum. Þess í stað hafi útgerðin tekið stærri hluta á sig.

Nú tekur við kynning samninganna til félagsmanna og ætlar Sjómannasambandið að hafa snör handtök. „Við kynnum samninginn fyrir félagsmönnum um helgina,“ sagði Konráð og bætti því við að greidd verði atkvæði um hann þar til á morgun. Verði samningurinn samþykktur fara fyrstu skip frá höfn annað kvöld.

Líst ótrúlega vel á þetta

Með kjara­samn­ing­um sjó­manna og út­gerða er verið að koma í veg fyr­ir var­an­legt tjón í grein­inni og fyr­ir þjóðarbúið og tryggja at­vinnu bæði þeirra sem deildu og þeirra sem vinna í af­leidd­um störf­um eins og fisk­vinnslu. „Samn­ingsaðilar stóðu sig eins og hetj­ur,“ seg­ir Þor­gerður Katrín Gunn­ars­dótt­ir, sjáv­ar­út­vegs- og land­búnaðarráðherra, í sam­tali við mbl.is.

„Mér líst ótrú­lega vel á þetta. Samn­ingsaðilar risu und­ir traust­inu sem ég alla tíð bar til þeirra,“ seg­ir Þor­gerður og bæt­ir við að lok verk­falls séu gríðarlega dýr­mæt fyr­ir grein­ina og ekki síður fyr­ir kjaraviðræður sem séu fram und­an og sendi þau skila­boð til deiluaðila að það sé þeirra að klára samn­inga án aðkomu rík­is­ins.

Þor­gerður seg­ist hafa trú á því að mest­all­ur eða all­ur loðnu­kvót­inn veiðist á næstu vik­um verði samn­ing­ur­inn staðfest­ur. „Síðustu dag­ar eru bún­ir að vera dýr­ir fyr­ir þjóðarbúið,“ seg­ir hún og bæt­ir við að frétt­ir næt­ur­inn­ar séu stór­kost­leg­ar frétt­ir fyr­ir alla aðila.

„Nú mun upp­bygg­ing­ar­starf hefjast að nýju,“ seg­ir hún og vís­ar þar til þess að ein­hver viðskipta­sam­bönd kunni að hafa slitnað og vinna þurfi að því að byggja upp markaðsstarf að nýju er­lend­is. „Það sem hjálp­ar okk­ur er gott hrá­efni og vönt­un á fiski og ára­löng reynsla við að markaðssetja fisk­inn,“ seg­ir Þor­gerður aft­ur á móti um verk­efnið fram und­an.

„Eitt stórt takk og húrra fyr­ir samn­ingsaðilum,“ seg­ir Þor­gerður að lok­um, enda aug­ljós­lega mjög ánægð með bæði út­gerðir og sjó­menn. „Þeir eiga mikið lof skilið.“