Börkur landaði kolmunna á Seyðisfirði

Deila:

Börkur NK kom til Seyðisfjarðar í gærmorgun og landaði þar tæplega 2.300 tonnum af kolmunna í fiskimjölsverksmiðjuna.

Gunnar Sverrisson verksmiðjustjóri var að vonum kátur að fá afla til vinnslu. Hann sagði hráefnið gott til vinnslu og löndun gengi vel í fallegu sumarveðri á Seyðisfirði og reiknaði með að klára löndun upp úr miðnætti.

Heimasíða Síldarvinnslunnar náði tali af Hjörvari Hjálmarssyni skipstjóra í gærmorgun og var hann að vonum ánægður með veiðina og hugðist hann nýta daginn á Seyðisfirði í fjallgöngu og hlaup áður en skipið heldur aftur út.

„Við erum að landa tæplega 2.300 tonnum af fallegum kolmunna sem fékkst austast í færeysku lögsögunni. Veiðin gekk vonum framar og fékkst aflinn í 7 holum. Við stefnum svo aftur á miðin á morgun og vonumst til að áfram verði gangur í þessu. Veðrið á miðunum var eins og best verður á kosið og hreyfði varla vind,“ sagði Hjörvar.

 

Deila: