Heimildir Norðmanna til loðnuveiða meiri en Íslendinga

Miðað við tillögur um loðnukvóta við Ísland og í Barentshafi verða heimildir Normanna til loðnuveiða á næsta ári mun meiri en heimildir íslenskra skipa. Hafrannsóknastofnun hefur lagt til að veiðar hér fari ekki yfir 208.000 tonn og í Barentshafi hefur verið gefinn út kvóti upp á 205.000 tonn.

Samkvæmt samningum um skiptingu loðnukvótans hér við land, koma 81.% í hlut Íslands eða 169.080 tonn, 11% í hlut Grænlands eða 22.280 tonn og 8% í hlut Noregs eða 16.640 tonn. En samkvæmt „Smugusamningnum“ fá Norðmenn að auki heimildir til veiða á 31.024 tonnum af loðnu við Ísland miðað við að tillögur Hafró verði að endanlegri úthlutun. Það magn mun þá dragast af kvóta Íslendinga, sem þá verður rétt rúm 138.000 tonn. Þannig geta heimildir norskra skipa til loðnuveiða hér við land á næsta ári orðið samtals 47.664 tonn.

Norðmenn hafa 60% af loðnukvótanum í Barentshafi en Rússar 40%. Hlutur Noregs af heildarúthlutun upp á 205.000 tonn er því 123.000 tonn. Samtals geta heimildir norskra loðnuskipa á næstu vertíð orðið um 170.000 tonn en heimildir íslenskra skipa 138.000 tonn.

Langt er síðan Norðmenn hafa haft meiri heimildir en Íslendingar til loðnuveiða og mun það væntanlega hafa mikil áhrif á samkeppnisstöðu þjóðanna á mörkuðum fyrir loðnuafurðir. Sérstaklega getur það átt við markaðinn fyrir loðnuhrogn sem Íslendingar hafa einir notið undanfarin ár. Norðmenn hafa ekki getað veitt loðnu til hrognatöku hér við land vegna reglugerðar um veiðarnar, en nú geta þeir nýtt kvóta sinn í Barentshafi til hrognatöku.