„Þetta er brjálæði“

Smábátamönnum er brugðið nú, þegar þeir fá reikninginn fyrir veiðigjaldið fyrir Septembermánuð. Gjaldið fyrir þorsk og ýsu hefur meira en tvöfaldast frá síðasta fiskveiði ári og er nú orðið um 9% af  verði á þessum tegundum upp úr sjó. Um þetta er fjallað í færslu á heimasíðu Landssambands smábátaeigenda þar sem segir svo:

„Landssamband smábátaeigenda hefur talað fyrir daufum eyrum þegar vakin hefur verið athygli á yfir hundrað prósenta hækkun veiðigjalda í þorski og ýsu.  Alþingismenn virtust og virðast þó hafa á hreinu að eitthvað þarf að gera til að koma til móts við litlar og meðalstórar útgerðir.  LS hefur bent á leið sem hægt er að fara og væntir þess að nýkjörnir alþingismenn láti málið til sín taka strax og þingstörf hefjast.

Breyttar reglur um greiðslu veiðigjalds kveða á um að gjalddagi sé 1. dag hvers mánaðar vegna veiða þar síðasta mánaðar.  M.ö.o. reikningur sem útgerðir hafa fengið sendan og er á gjalddaga 1. nóvember er fyrir afla sem veiddur var í september.

Af samtölum við smábátaeigendur í dag er ljóst að mönnum er brugðið.  Aflinn að mestu þorskur og ýsa þar sem veiðigjald hækkaði um 107% og 127% milli ára.  Algengt er að gjaldið nú sé á milli 8,5 og 9% af aflaverðmæti.  Fullyrða má að alþingismenn sem samþykktu lög um veiðigjald hafa ekki gert ráð fyrir að gjaldið gæti numið svo háu hlutfalli af aflaverðmæti sem nú blasir við.

Hér á eftir eru setningar sem hrutu af vörum smábátaeigenda í dag sem tjáðu sig um reikninginn.

„Þetta gengur ekki upp“

„Veiðigjaldið er 8,9% af því sem ég fékk fyrir aflann í september“

„Við erum 2 um borð, nú hefur fjölgað um einn og hálfan háseta sem ekki láta sjá sig, en þiggja fulla greiðslu“

„Þetta er brjálæði“

„Ég er að gefast upp“

Gríðarlega erfið staða sem kallar á tafarlaus viðbrögð ef ekki á illa að fara.“