Veiðigjald er landsbyggðarskattur
„Skattar og gjöld til ríkis og sveitarfélaga er eitthvað sem allir verða að standa skil á. Greiðslur geta þó haft mismunandi áhrif á nærsamfélagið, eftir því hvar á landinu þær eru greiddar. Svo dæmi sé tekið þá munar Selfoss kannski ekki sérlega mikið um það, hvort veiðigjald á sjávarútvegsfyrirtæki er hækkað eða lækkað. Annað kann að eiga við byggðir þar sem sjávarútvegsfyrirtæki eru burðarás samfélagsins.“ Svo segir í færslu á heimasíðu Samtaka fyrirtækja í sjávarútvegi. Þar segir ennfremur:
„Tökum sem dæmi Bolungarvík. Fram kemur í nýlegri úttekt, sem gerð var fyrir sveitarfélagið, að veiðigjald sjávarútvegsfyrirtækja þar á þessu fiskveiðiári, sem byrjaði 1. september, sé áætlað um 311 milljónir króna. Er þar um að ræða þreföldun frá fyrra ári. Jón Páll Hreinsson bæjarstjóri í Bolungarvík lýsir áhrifunum með eftirfarandi orðum í samtali við Morgunblaðið á dögunum: „Ég er mjög hugsi yfir því hvaðan þeir peningar [hækkun veiðigjalds] eiga að koma. Ekki verða þeir teknir af framlegð fyrirtækjanna eins og hún er í dag. Ég get ekki séð annað en hún verði þá tekin með því að draga saman í kostnaði, fækka störfum, minnka þjónustu, hætta allri þróun og hætta að sækja fram. Ég sé ekki annað en að þetta samfélag sem ég stýri sé að fara að borga fyrir þetta dýrum dómum.“
Því er við að bæta að veiðigjald yfirstandandi fiskveiðiárs grundvallast á rekstrarárinu 2015, sem var hagstætt ár í sjávarútvegi. Nú, þegar greiða á gjaldið, horfir allt öðruvísi við og rekstrarskilyrði eru mun verri en árið 2015. Þannig hefur gengi krónunnar styrkst verulega frá þeim tíma og dágóð hækkun hefur orðið á kostnaði, sem til fellur í íslenskum krónum, svo einstakir augljósir áhrifaþættir séu nefndir.
Á myndinni hér að neðan má sjá að 21% af álögðu veiðigjaldi árið 2015 lagðist á sjávarútvegsfyrirtæki á höfuðborgarsvæðinu, en 79% hins álagða gjalds lagðist hins vegar á sjávarútvegsfyrirtæki á landsbyggðinni. Það er að segja; fjórir fimmtu gjaldsins eru greiddir af fyrirtækjum á landsbyggðinni. Af þessu verður ekki dregin önnur ályktun en sú, að hækkað veiðigjald muni hafa meiri og afdrifaríkari áhrif á landsbyggðina en höfuðborgarsvæðið.
Jón Páll bæjarstjóri bætir við: „Það er ekki nóg með að þessi peningur hverfi út úr bæjarfélaginu heldur hefur maður áhyggjur af því að þróunin leiði til aukinnar samþjöppunar sem þýðir bara að þær útgerðir sem eiga fjármagn kaupa upp þær útgerðir sem eru minni og veikari, …“ Rétt er að ítreka að ráðamenn hafi þessi sjónarmið í huga, enda getur það varla verið vilji þeirra að þrengja mjög að rekstrarskilyrðum sjávarútvegsfyrirtækja vítt og breitt um landið og hvetja til samþjöppunar.“