Fiskafli í febrúar svipaður og í fyrra

Fiskafli íslenskra skipa í febrúar var 84.724 tonn. Botnfiskafli var rúm 37 þúsund tonn, þar af nam þorskaflinn rúmum 24 þúsund tonnum. Ríflega 4 þúsund tonn veiddust af ufsa og tæp 4 þúsund tonn af ýsu. Afli uppsjávartegunda var 46,5 þúsund tonn í febrúar og skiptist í 36,5 þúsund tonn af loðnu og tæp 10 þúsund tonn af kolmunna samkvæmt upplýsingum Hagstofu Íslands.

Á 12 mánaða tímabili frá mars 2017 til febrúar 2018 hefur heildarafli aukist um tæp 276 þúsund tonn eða 28% samanborið við 12 mánaða tímabil ári fyrr.

Samanburður milli febrúarmánaða 2017 og 2018 er erfiður fyrir þær sakir að verkfall sjómanna stóð fram í febrúar í fyrra og hafði mikil áhrif. Botnfiskafli var þá mun minni en í hefðbundnu ári. Nú er hann því nærri tvöfalt meiri en í fyrra. Engu að síður er fiskaflinn nú minna en fyrir ári síðan. Það skýrist reyndar alfarið af minni loðnuafla nú en í fyrra. Kvótinn í fyrra var mun meiri en nú og eftir verkfall í fyrra var sótt stíft í loðnuna til að ná kvótanum. Í ár var staðan hins vegar þannig að kvóti var lítill og geymdu útgerðirnar heimildir sínar að miklu leyti fram í mars, til að ná hrognaloðnu til frystingar og hrognatöku, en þær afurðir skila mestum verðmætum.