Kolmunnamok

Fyrir og um nýliðna helgi var mokveiði hjá kolmunnaskipunum í færeysku lögsögunni. Skipin voru gjarnan að fylla sig á einum sólarhring eða svo og þurfti að hægja á veiðunum vegna þess að kolmunninn er viðkvæmt hráefni. Fiskurinn er kældur um borð í skipunum en hann geymist ekki vel eftir löndun samkvæmt frétt á heimasíðu Síldarvinnslunnar.

Burðargeta þeirra skipa sem landa hjá Síldarvinnslunni er um 12.800 tonn en samanlögð afkastageta verksmiðjanna í Neskaupstað og á Seyðisfirði er 2.500 tonn á sólarhring. Kolmunninn er þess eðlis að afar mikilvægt er að stilla saman veiðar og vinnslu á honum.

Bæði Gunnar Sverrisson verksmiðjustjóri á Seyðisfirði og Hafþór Eiríksson verksmiðjustjóri í Neskaupstað segja að vinnslan á kolmunnanum gangi mjög vel, en mikilvægt sé að hráefnið sé unnið sem fyrst eftir löndun.

Á Seyðisfirði landaði Beitir NK 3.000 tonnum á mánudaginn en á undan honum lönduðu Margrét EA 2.100 tonnum og Vilhelm Þorsteinsson EA 2.100 tonnum. Í Neskaupstað er Vilhelm Þorsteinsson EA að landa 2.100 tonnum en á undan honum lönduðu Börkur NK 2.330 tonnum og Bjarni Ólafsson AK 1.830 tonnum.