Með 1.800 tonn af feitum og fallegum kolmunna

Víkingur AK kom til hafnar á Vopnafirði um miðnætti í gær með um 1.800 tonn af kolmunna. Albert Sveinsson, skipstjóri segir þetta vera feitan og fallegan fisk sem fékkst sunnarlega í færeyskri lögsögu.
,,Þetta var barningur en þó lentum við í smá hrotu þar sem hægt var að hífa tvisvar á dag. Verst að það var haugabræla þessa sömu daga en það tjáði ekkert að hugsa um það,“ segir Albert í samtali á heimasíðu HB Granda.
Kolmunninn á svæðinu er á suðurleið til hrygningar eftir að hafa verið á ætisslóð í Norðurhöfum í sumar og Albert segir að reynslan sýni mönnum að veiðin geti glæðst upp úr þessu.
,,Það var töluvert af skipum komið á svæðið og þeim fer fjölgandi. Nokkur íslensk skip voru þarna að veiðum en annars voru skipin frá ýmsum þjóðríkjum,“ sagði Albert Sveinsson.