Hækkandi fiskverð eykur aflaverðmæti

Verðmæti afla í ágúst nam 14,4 milljörðum króna sem er 21,3% meira en í ágúst í fyrra. Botnfiskafli jókst um 23,1% að verðmæti og var 8,5 milljarðar. Allar helstu botnfisktegundir jukust að verðmæti milli ára, þorskur um 10,8%, ýsa um 37% og ufsi um 72,9%.

Verðmæti uppsjávarafla var 46,3% meiri en í ágúst 2018, eða tæplega 4,7 milljarðar en var tæpir 3,2 milljarðar 2018. Aðaluppistaðan í uppsjávaraflanum var makríll, en verðmæti hans var 4,3 milljarðar. Virði flatfiskafla var 20,3% minni en í ágúst 2018 og nam 1.077 milljónum.

Verðmæti afla sem seldur var í beinni sölu útgerða til vinnslu innanlands nam rúmum 7,3 milljörðum króna í ágúst. Verðmæti sjófrysts afla nam tæpum 4,8 milljörðum og verðmæti afla sem seldur var á markað til vinnslu innanlands nam rúmum 1,5 milljörðum.

Á síðasta fiskveiðiári, frá september 2018 til ágúst 2019, nam aflaverðmæti úr sjó 142,6 milljörðum, sem er 14% aukning miðað við fyrra fiskveiðiár.

Þegar nánar er litið á þessar verðmætatölur má sjá verðmætið hefur aukist um 21,3%, en aflinn á sama tíma aðeins um 8%, sem bendir ótvírætt til hækkunar fiskverðs. Þetta sést enn skýrar þegar litið er á þorskinn. Þorskafli í ágúst var 16.415 tonn, sem er 10% samdráttur miðað við sama mánuð árið áður. Engu að síður eykst verðmæti þorskaflans  10,8%. Ýsuafli stóð í stað, en verðmæti hans hækkaði um 37%. Afli af ufsa jókst um 12% en verðmæti hans 79,2%. Loks er það karfinn. Afli af honum var í ágúst síðastliðnum 5.320 tonn, sem er samdráttur um 17%. Engu að síður eykst verðmæti karfaaflans um 15,9%.

Þetta endurspeglar þá gífurlegu hækkun á fiskverði sem verið hefur frá því á sama tíma í fyrra. Verðið þá var reyndar mjög lágt er nú í hæstu hæðum, sérstaklega á fiskmörkuðum, en verð í beinum viðskiptum hefur sömuleiðis hækkað umtalsvert.

Hagtölur sem birtast í þessari fréttatilkynningu frá Hagstofunni eru bráðabirgðatölur. Þær byggjast á gögnum um verðmæti fyrstu sölu landaðs afla sem Fiskistofa safnar saman.