Ekki grunur um íkveikju
Lögreglan á Suðurnesjum telur að eldurinn sem kviknaði í Grímsnesi GK-555 í Njarðvíkurhöfn hafi ekki brotist út með saknæmum hætti. Með öðrum orðum er ekki grunur um íkveikju. Einn lést í brunanum en sjö menn voru í skipinu aðfaranótt þriðjudags, þegar eldurinn kom upp.
Fram kemur í tilkynningu frá lögreglu að rannsókn málsins miði vel. Lögregla bindur vonir við að geta upplýst um eldsupptök. Rannsókn lögreglu á vettvangi er lokið en skipið hefur verið afhent eigendum og tryggingafélagi til umráða. Í tilkynningunni segir að lögregla vinni nú úr rannsóknargögnum með aðstoð tæknideildar lögreglunnar á höfuðborgarsvæðinu.
Eins og áður segir lést karlmaður í eldsvoðanum en tveir til viðbótar slösuðust alvarlega.
