Fjöldi mótmælti á Austurvelli
Fjölmenn mótmæli fóru fram á Austurvelli um helgina, þar sem sjókvíaeldi var mótmælt. Fundargestir kröfust þess að fiskeldið yrði stöðvað. Sjö samtök stóðu fyrir mótmælafundinum. Þau voru: Ungir umhverfissinnar, Náttúruverndarsamtök Íslands, Landvernd, Landssamband veiðifélaga, Verndarsjóður villtra laxastofna, Íslenski náttúruverndarsjóðurinn og VÁ-félag um vernd fjarðar.
„Þessa dagana róum við, ásamt bændum og landeigendum, öllum árum að því að takmarka það tjón sem sjókvíaeldið hefur valdið okkur og villta laxastofninum. En það er ekki nóg. Nú þarf að stöðva þennan mengandi iðnað í eitt skipti fyrir öll,“ segir í bréfi sem Landssamband veiðifélaga sendi frá sér vegna mótmælanna. Þar segir að málið snúist um tilvist villta laxastofnsins, hvort hann muni lifa eða deyja.