Smábátar komnir yfir þúsund tonn af makríl
Alls eru 30 smábátar byrjaðir veiðar á makríl. Aflastaðan í gærmorgun var 1.058 tonn, þar af 902 tonn úr aflareynslupottinum. Helmingur þeirra sem byrjaðir eru veiðar eru komnir með yfir 30 tonn.
Megnið af aflanum hefur veiðst við Reykjanesið aðallega í og útaf Keflavík. Aðrir veiðistaðir eru við Snæfellsnes og í Steingrímsfirði.
„Makríllinn er vandveiddur. Einn daginn gefur hann sig það vel að bátarnir fylla sig hver á fætur öðrum, en aðra dagar lætur hann ekki sjá sig,“ segir í frétt á heimasíðu Landssambands smábátaeigenda.
Alls eru aflaheimildir smábáta á vertíðinni rúm 9.000 tonn. Í aflareynslupottinum um 7.000 tonn og rúm 2.000 tonn til úthlutunar aukalega ásamt því sem flutt var milli ára.