Hækkandi þorskverð eykur aflaverðmæti

Samkvæmt bráðabirgðatölum frá Fiskistofu var aflaverðmæti úr sjó tæplega 13,5 milljarðar króna í apríl, sem er 16% meira en í apríl 2018. Verðmæti botnfiskaflans var tæpir 10,9 milljarðar og jókst um 28,1% miðað við apríl árið áður. Þar af nam verðmæti þorskaflans 5,8 milljörðum sem er 23,3% aukning. Verðmæti landaðrar ýsu jókst einnig umtalsvert, úr 861 milljón króna í 1.784 milljónir. Uppsjávarafli dróst saman um 22,7% og var að mestu kolmunni. Aflaverðmæti flatfisktegunda var 842 milljónir króna og jókst frá fyrra ári samkvæmt frétt frá Hagstofu Íslands.

Á 12 mánaða tímabili frá maí 2018 til apríl 2019 jókst aflaverðmætið um 9,2% miðað við sama tímabil ári fyrr.

Það vekur athygli að aflaverðmæti skuli hækka um 16% í apríl á þessu ári, borið saman við sama mánuð í fyrra, þar sem afli í apríl nú var 23% minni en í sama mánuði í fyrra. Lækkun heildaraflans skýrist að langmestu leyti af mun minni kolmunnaafla. Botnfiskafli í apríl nú var sá sami og í apríl í fyrra., eða um 49.000 tonn. Engu að síður hækkar verðmæti botnfiskaflans um 28,2%. Þorskafli í apríl í ár var tæp23.000 tonn og dróst saman um 2%. Engu að síður eykst verðmæti hans 23,3%. Þessi aukning verðmæta skýrist því fyrst  og fremst af hækkuðu fiskverði. Tvöföldun á heildarverðmæti ýsuaflans liggur hins vegar í tæplega tvöföldun aflans, sem fór í tæp 7.600 tonn í apríl á móti 3.944 tonnum árið áður. Úr því má lesa að verða á ýsu hefur hækkað miklu minna en á þorskinum.